Hukumar Hisbah ta jihar Kano a arewacin Najeriya ta kama wani boka da ake zargi da yi wa wata mata ciki bayan ta je wajen sa neman magani.

Bokan mai suna Muhammad Mansur, mazaunin karamar hukumar Dawakin Kudu an kama shi bayan matar da ba a bayyana sunanta ba, ta kai kara tana neman a bi mata hakki dauke da cikin wata bakwai.

Rahotanni daga garin na nuna cewa bokan ya yi fice wajen yaudarar mata, ciki har da matan aure.

Bokan na yaudarar mata ta hanyar shaida masu cewa idan suka kwana da shi zai ba su maganin da zai hana a yi masu kishiya da kuma samun damar mallakar miji.

Ta faɗa wa Hisbah cewa lokacin da ta je neman maganin wajen bokan ya shaida mata cewa ba zai yiwu ba, sai sun kwana tare.

A cewar ta, mutumin ya jima yana neman saduwa da ita, idan sun je wajen tare da mahaifiyarta, amma bai yi nasara ba har sai lokacin da ta ziyarce shi ita kaɗai.

Bokan, Muhammad Mansur ya amsa wannan laifi, sai dai ya ce aikin shaiɗan ne.

Shugaban rundunar Hisbah reshen karamar hukumar, Ustaz Kabiru Musa Dawakiji, ya ce za su ci gaba da bincike domin ɗaukan mataki.

The post Hukumar Hisbah a Jihar Kano ta Kama Bokan da ya yi wa Mata Ciki appeared first on Arewa Agenda Hausa.

Dakarun sojojin Najeriya sun yi nasarar kama bokan tsohon hatsabibin ɗan fashi Terwase Akwaza.

An kama Ugba Lorlumun mai shekaru 75 a duniya ne a kusa da matsafarsa da ke jihar Benue.

Sojojin sun ce sun kuma kama wasu daga cikin sauran ƴan kungiyar fashi da makamin na Gana.

Sojojin Najeriya na musamman da ke Doma a ƙaramar hukumar Doma na Jihar Nasarawa a ranar Laraba ta ce ta kama Ugba Lorlumun mai shekaru 75 da ake zargin bokan marigayi shugaban ƴan fashin Benue, Terwase Akwaza da aka fi sani da Gana ne, The Punch ta ruwaito.

An kuma kama Gana ne a Satumban 2020 sannan sojojin SF command da ke Doma suka kashe shi.

A yayin taron manema labarai a ranar Laraba, Kwandan 4 special forces, Manjo Janar Moundhey Ali ya ce an kama bokan tare da wani da ake kira ‘kwamanda’ a yayin da aka kai sumame wurin tsafin su.

Ya ce, “A Benue, mun kama babban bokan marigayi Terwase da aka fi sani da Gana da ɗaya daga cikin ƴan kungiyarsa da ake kira kwamanda sannan muka ƙona matsafar. Yayin da wani ɓata gari, Paul Duguma ya mutu a Katsina Aka.”

A hirar da ya yi da wakilin The Punch bayan sumamen, bokan ya ce, “Na yi wa mutanen Gana huɗu layyu, sun sake zuwa sun ce suna son layar zana sai na tambaya abinda za suyi da shi. Sun yi barazanar min duka sai na gudu zuwa gada inda sojojin suka kama ni.”

Kazalika, Ali ya kuma ce an kama karin wasu mambobin kungiyar marigayi Gana su 41.

The post Rundunar Sojoji ta yi Nasarar Kama Wani Hatsabibin Boka appeared first on Arewa Agenda Hausa.