Barcelona: Pedri da De Jong na cikin ‘Yan Wasan da za su Fuskanci Atletico
Barcelona za ta karbi bakuncin Atletico Madrid a wasan mako na 30 a La Liga ranar Lahadi a Camp Nou.
Barcelona ta samu karin karfin gwiwa, bayan da Pedri da Frenkie de Jong suke daga cikin ‘yan wasan da za su fuskanci Atletico.
Ranar 8 ga watan Janairun 2023, Barcelona ta je ta ci Atletico 1-0 a wasan farko a La Liga a bana, Ousmane Dembele ne ya ci kwallo a minti na 22.
Barcelona tana matakin farko a kan teburin La Liga da maki 73, sai Real Madrid ta biyu mai maki 65 da kuma ta uku Atletico Madrid mai maki 60.
Read Also:
Babban wasa ne da manyan kungiyoyin Sifaniya za su kece raini, inda Barcelona ke fatan lashe La Liga na bana, Atletico so take ta koma ta biyu a teburi ta baro da Real Madrid.
Tuni Xavi ya bayyana ‘yan wasa 21 da zai fuskanci Atletico da su ciki har da Pedri da Frenkie de Jong, wadanda suka sha jinya.
Wani dan wasa da ya ja hankalin masu ruwa da tsaki a fannin tamaula shine Lamine Yamal mai shekara 15 da ke cikin ‘yan kwallon Barca da za su kara da Atletico.
Yamal ya zama matashi mai karancin shekarun haihuwa da Barcelona ta saka shi a babban wasa a tarihin kungiyar.
Idan har ya buga karawar zai zama mai karancin shekarun haihuwa da ya buga wa Barcelona tamaula a tarihinta.
