‘Yan Bindiga Sun Hallaka Manoma 11 a Jihar Sokoto
Tsagerun yan bindiga sun kai farmaki kan manoma a yankin gabashin jihar Sokoto a ranar Asabar, 2 ga watan Yuli.
An tattaro cewa yan bindigar sun kuma hallaka manoma 11 da ke kan gudanar da ayyuka a gonakinsu.
Mummunan harin ya afku ne a yankin garin Gandi Dalike da ke karamar hukumar Rabah ta jihar.
Sokoto – Yan fashi da makami a yankin gabashin jihar Sokoto sun kaddamar da kazaman hare-hare kan manoma, jaridar The Nation ta rahoto.
Read Also:
Majiyoyi sun bayyana cewa maharan sun kashe manoma 11 a cikin makon da ya gabata a garin Gandi Dalike da ke yankin karamar hukumar Rabah ta jihar.
Wani mazaunin yanki ya ce yan bindigar da yawansu sun farmaki kauyen a ranar Asabar, 2 ga watan Yuli.
Sakataren hakimin Gandi, Alhaji Tukur Muhammad, ya ce maharan sun isa yankin da maraicen wannan rana sannan suka kashe wasu manoma a gonakinsu.
Rahoton ya kuma kawo cewa wani jigo a Gandi, Alhaji Idris Gandi, ya ce yan bindiga sun kashe wasu manoma hudu da ke aiki a gonakinsu a Gidan Buwai da ke kauyen Gandi a kwanan nan.
