‘Yan Bindiga Sun Kashe Mutane 11 a Jahar Katsina
‘Yan bindiga sun kai mummunan hari kauyen Dan-Kumeji da ke karamar hukumar Kankara a jahar Katsina.
An tattaro cewa sun kashe mutane 11 tare da jikkata wasu shida a harin da suka kai da misalin karfe 11:30 na dare.
Zuwa yanzu ba a ji ta bakin rundunar ‘yan sandan jahar ba kan lamarin.
Rahotanni sun kawo cewa ‘yan bindiga sun harbe akalla mazauna kauyen Dan-Kumeji da ke karamar hukumar Kankara a jahar Katsina 11 har lahira.
Jaridar Daily Trust ta tattaro cewa mutane shida da suka samu raunuka a harin suna karbar magani a asibiti a yanzu haka.
Read Also:
Wani mazaunin garin, Abdulmumini Sani, wanda ya tabbatar da faruwar lamarin a wata hira ta wayar tarho, ya ce maharan sun afka wa kauyen da misalin karfe 11:30 na dare inda suka fara harbi ba kakkautawa, jaridar Thisday ta kuma rawaito.
Ya ce:
“Lokacin da mutanenmu suka gan su, sai suka fara gudu don tsira, ba tare da sanin cewa wasu daga cikin maharan sun yi kwanton bauna a wurare masu mahimmanci ba.Sai kawai suka fito suka fara harbin wadanda ke kokarin tserewa daga harin.”
Ya kara da cewa a safiyar yau Juma’a an kirga gawarwaki kusan 11 kuma ana ci gaba da shirye-shiryen binne gawarwakin da aka gano.
Kakakin ‘yan sanda a Katsina, SP Gambo Isah, bai tabatar da faruwar lamarin ba har zuwa lokacin hada wannan rahoton.
