‘Yan Bindiga Sun Kashe Soja Tare da Garkuwa da Mata da Yaranta 2 a Unguwar Milgoma a Jahar Kaduna
‘Yan bindiga sun halaka wani soja yayin da suka afka unguwar Milgoma a Zaria suka yi garkuwa da wata mata da yaranta biyu.
Duk da dai ba a bayyana asibitin da sojan ya cika ba, amma ya samu miyagun raunuka ne sakamakon ragargazar da ‘yan bindigan su ka yi ma sa.
Rahotanni sun tabbatar da yadda lamarin ya faru a ranar Litinin, 13 ga watan Satumba da misalin karfe 9 na dare sannan ‘yan bindigan da su ka kai harin sun kai 30.
Read Also:
Zaria, Jahar Kaduna – Wani lamari mai firgitarwa ya afka Milgoma da ke kallon asibitin koyarwa na Jami’ar Ahmadu Bello da ke Shikan Zaria a jahar Kaduna.
‘Yan bindiga sun isa Milgoma da misalin karfe 9 na daren ranar Litinin kamar yadda mazauna yankin su ka tabbatar.
Kamar yadda Daily Trust ta rawaito, sun halaka wani soja sannan suka dauke wata mata da yaranta 2. Kuma sojan ya koma ga mahaliccin sa ne sakamakon ragargazar sa da suka yi da bindigogin su.
Wata majiya mai karfi daga Milgoma ta tabbatar da yadda yawan ‘yan bindigan ya kai 30, sannan rike da miyagun makamai suka isa suna harbe-harbe ta ko ina.
