Bayan Mutuwar Shekau ‘Yan Boko Haram 45 Sun Mika Wuya ga Sojojin Najeriya
Karin yan Boko Haram 45 sun mika wuya ga Sojoji ranar Litinin.
Sun bayyana dalilin da yasa suka yanke shawarar ajiye makamansu.
Wannan shine karo na uku da yan ta’adda zasu mika wuya kwanan nan.
Akalla mutum 45 wanda ya hada da mayakan Boko Haram/ISWAP matasa yan kasa da shekaru ashirin guda 14 tare da mata da yara 31 sun mika wuya ga Sojoji a ranar Litinin.
An tattaro cewa tubabbun yan ta’addan sun alanta fitarsu daga Boko Haram ne a karamar hukumar Konduga ta jahar Borno, Arewa maso gabashin Najeriya.
Sun mika kansu ne ga kwamandojin rundunar Operation Hadin Kai.
PRNigeria ta ce a cewar wani jami’in leken asiri na hukumar Sojoji wanda ya bukaci sakaye sunansa, wannan karon yan ta’addan basu mika wuya tare da makamansu ba.
Yace:
Read Also:
“Daga cikin yan ta’adda 45 da suka mika wuya, 21 sun fito ne daga Garin Dinya, kuma 22 daga kauyen Jaja Kalwa.”
Mutum biyar daga cikin yan ta’addan sun bayyanawa PRNigeria cewa an tilastasu shiga kungiyar yan ta’adda ne.
Modi Malaram daga Jaja Kalwa yace:
“Wallahi, yawancinmu yara ne kuma marasa karfi na yakan kwamandojin Boko Haram da suka sacemu daga kauyukanmu.”
“Tun a baya mun san kungiyar na shaidnu ne, amma mun kasa yaki da su saboda kashemu za’a yi. Wadanda sukayi kokarin guduwa a gabanmu aka kashesu.”
“Duk da ni da iyalina mun mika wuya, ban tunanin mutan garinmu zasu sake yarda da mu.”
Akwai rabuwar kai tsakanin kwamandojin Boko Haram
Malaram ya kara da cewa yanzu haka akwai rabuwar kai tsakanin kwamandojin kuma haka ya sa suka iya fitowa mika wuya.
“Bayan mutuwar Shekau, an samu sabanin cikin gida da fadace-fadace, kuma hakan ya faranta mana rai. Amma kuma ruwan wutan da sojoji keyi ya tilasta mana guduwa da sansaninsu. Haka yasa muka fito don mika wuya,” ya kara.
