‘Yan Daba Sun Kashe ‘Dalibin Jami’ar Jos
Wasu da ake zaton ‘yan daba sun halaka wani dalibin jami’ar Jos ta hanyar caka masa wuka.
An tattaro cewa dalibin na a cikin a daidaita sahu lokacin da maharan suka far masa.
Shugaban kungiyar dalibai ta jami’ar (SUG), Kwamared Danladi Joshua Adankala, ya tabbatar da lamarin tare da yin Alla-wadai da shi.
Rahotanni sun kawo cewa wasu ‘yan daba sun caka wa wani dalibin jami’ar Jos wuka har lahira a kusa da makarantar.
Lamarin ya faru ne ‘yan awanni bayan da gwamnan jahar Filato, Simon Bako Lalong ya sassauta dokar hana fita ta sa’o’i 24 a karamar hukumar Jos ta Arewa, jaridar Daily Trust ta ruwaito.
Read Also:
An tattaro cewa lamarin ya faru ne da misalin karfe 2:30 na rana lokacin da harkoki ke komawa daidai a hankali a babban birnin jahar.
Shuaban kungiyar dalibai ta jami’ar (SUG), Kwamared Danladi Joshua Adankala, ya tabbatar da ci gaban ga manema labarai a Jos.
A cewarsa, an ciro wanda aka kashe daga adaidaita sahu sannan aka caka masa wuka har lahira.
Ya bayyana lamarin a matsayin abin takaici kuma wanda bai dace ba.
Ya ce:
“Dalibin ya hau keken adaidaita sahu daga makarantar zuwa babban harabar jami’ar kuma kwatsam a kan hanya, sai aka ciro shi aka caka masa wuka har lahira.
“Hawayenmu na neman adalci ba su haifar da komai ba illa ƙarin radadi, zafi, tsoro, baƙin ciki da kuka mara iyaka.
“Cikin gaggawa, ya kamata gwamnatin jahar ta yi kira ga gwamnatin tarayya da ta sauƙaƙe gina shingen kewaye na makarantarmu.
Yakamata a sami ƙarin dakunan kwanan dalibai. Wannan zai taimaka matuka wajen rage yawan daliban da ke zama a cikin gari.”
