Mun Kashe ‘Yan Ta’adda 52 da Kama 53 a Jihohin Borno da Yobe – Sojoji
Hedkwatar tsaron Najeriya ta ce dakarunta sun yi nasarar kashe ƴan ta’adda 52 da kama 53 a wasu samame da suka kai jihohin Borno da Yobe.
Mai magana da yawun hedkwatar sojojin, Manjo-Janar Edward Buba, shi ya bayyana haka cikin wata sanarwa a ranar Juma’a, inda ya ce ƴan ta’adda bakwai da suka haɗa maza biyar da mata biyu sun miƙa kansu ga sojojin.
Read Also:
Janar Buba ya ce an kuɓuto da mutum 61 da aka yi garkuwa da su a wurare daban-daban da ke ƙasar.
Ya kuma ce dakarun Operation Haɗin Kai a yankin arewa maso gabas, sun yi artabu da ƴan ta’addan a lokacin da suka kai samame, inda suka samu nasarar ƙwato makamai da dama.
A ɗayan ɓangare, ya ce dakarun Operation Delta Safe sun samu nasarar kama masu satar ɗanyen man fetur, inda suka kwace lita 496, 250 na ɗanyen mai, injunan tuka-tuka guda huɗu, jiragen ruwa biyar da tankunan ajiye mai 57 da sauransu.
Janar Edward ya ce baya ga wannan, sojojin sun kwace harsasai daban-daban daga wajen masu aikata ta’asar.
