‘Yan Sandan Jahar Edo Sun Tsinci Gawar Budurwa a Motar Basarake
Jami’an ‘yan sanda a jahar Edo sun gano gawar wata budurwa mai shekaru 27 cikin motar wani basarake a jahar.
‘Yan uwan marigayiyar sun tafi asibitin inda suka rika kuka suna neman hukuma ta bi musu hakkinsu daga basaraken.
Daga bisani, jami’an yan sanda sun iso asbitin sun tafi da motar kirar Lexus SUV tare da gawar matar rufe a cikin motar.
Edo – Hankulan mutane ya tashi a jiya a harabar asibitin kwararru na jahar Edo da ke Sapele Road a Benin yayin da aka gano gawar wata budurwa rufe cikin wani motar basarake da aka sakayya sunansa kamar yadda The Guardian ta rawaito.
Read Also:
Faruwar lamarin ya jefa iyalan budurwar mai shekaru 27, mai suna Faith Aigbe cikin alhini.
Yan uwa da iyalan matar da ta riga mu gidan gaskiya sun taru suna cike da bakin ciki a yayin da gawar ta ke rufe cikin motar kamar yadda rahoton na The Guardian ya bayyana.
A cewar wasu daga cikin ‘yan uwan marigayiyar masu suna Mrs Janet Asemota da Mercy Eddy, sun yi ikirarin cewa basaraken ne ya kawo Faith asibitin.
Sun ce bayan ya gano ta mutu, basaraken sai ya rufe motar mai bakin gilashi kirar Lexus SUV ya kuma tsere.
Wata kawar marigayiyar da sauran ‘yan uwanta sun rika sharbar kuka suna neman a bi musu hakkin su.
Yan sanda daga Aideyan sun iso wurin da abin ya faru sannan suka dauki motar tare da gawar.
