Allah ya Yiwa Tsohon ‘Dan Kwallon Super Eagles, Bello Musa Kofarmata Rasuwa
Allah ya yiwa Tsohon dan kwallon Super Eagles kuma Kano Pillars, Bello Musa Kofarmata, cikawa daren Talata, 2 ga watan Nuwamba, 2022.
Bello ya mutu ne yana dan shekaru 34 bayan jinyar da yayi a gidansa dake unguwar Kofarmata, Kano, rahoton Leadership.
Tsohon mataimakin shugaban kungiyar marubuta labaran kwallo a Najeriya SWAN, Ado Salifu, ya bayyana hakan ga manema labarai a Kano.
Ya ce an yi jana’izarsa da safiyar Laraba a unguwar Kofarmata bisa koyarwan addinin Musulunci.
Read Also:
Kofarmata ya na cikin gwanayen yan kwallon da suka taya Kano Pillars lashe gasar Firimiyar Najeriya a 2007/2008 inda yaci kwallaye 11 a kakar.
Shine mutum mafi yawan kwallaye a shekarar. Bayan barin Kano Pillars a 2010, marigayin ya koma kungiyar kwallon Heartland a Owerri kafin komawa Elkanemi a 2012.
Bayan kankanin lokaci ya koma Kano Pillarsa sannan ya samu shiga kungiyar kwallon IK Start dake Norway.
Marigayin na cikin yan kwallon Najeriya U20 da suka taka leda a gasar kofin kwallon duniya da aka buga a Kanada 2007.
A 2010, ya bugawa Super Eagles wasar zumunta da Kongo guda a Abuja inda Najeriya ta lallasa DRC 5-2.
