Kungiyoyin da Suke Taimakawa Ta’addanci a Najeriya
Gwamnatin Najeriya ta fitar da sunayen mutum 15 waɗanda ta ce ana zargin su da taimakawa ta’addanci a ƙasar.
Hakan na kunshe ne cikin rahoton da hukumar tattara bayanan sirri kan sha’anin kuɗi a ƙasar (NFIU) ta fitar a ranar Talata.
Ta ce waɗanda ake zargi da taimakawa ta’addancin sun kunshi mutum tara da kuma masu kamfanonin canji.
Rahoton na NFIU ya nuna cewa kwamitin sa ido kan takunkumi a Najeriya ta zauna ranar 18 ga watan Maris, inda aka bayar da shawarar saka takunkumi kan wasu mutane da kuma kamfanoni saboda hannu a tallafawa ta’addanci.
“Babban Attoni Janar na Ƙasa, tare da amincewar shugaban ƙasa, ta ayyana waɗannan mutane da kamfanoni don a saka su a jerin waɗanda aka saka wa takunkumi,” kamar yadda raoton ya bayyana.
Read Also:
Cikin jerin mutanen har da Tukur Mamu, wanda ake ci gaba da shari’arsa kan zargin taimakawa ƴan bindiga waɗanda suka kai hari kan jirgin ƙasan Abuja-Kaduna a watan Maris ɗin 2022.
A cewar kundin da NFIU ta fitar, ta ce Mamu ya tallafawa ta’addanci ta hanyar karɓar kuɗi da ya kai $200,000 daga hannun waɗanda aka yi garkuwa da ƴan uwansu da kai wa masu garkuwa, don sakin fasinjojin jirgin ƙasan na Abuja-Kaduna.
Har ila yau, rahoton ya ce ɗaya daga cikin mutanen da ake zargi shi ne wanda ya kai hari kan cocin Katalika na St. Francis da ke Owo, a jihar Ondo ranar 5 ga watan Yulin, 2022.
An bayyana ɗaya daga cikin mutane a matsayin mamban ƙungiyar Ansarul Ansarul Muslimina Fi Biladissudam, wadda ke alaƙa da Al-Qaeda da ke yankin Maghreb.
Akwai kuma wani babban kwamandan ƙungiyar ISIS a Afrika ta Yamma, wanda shi ma ake zargi da taimakawa ta’addanci a Najeriya.
